garo wangala dancegaro wangala danceWanna folk Dance

Wangala

Wangala

Bluwin Chisik Sangma

A•ningcha Wangalonga chiningcha Duruonga,
A•a kimko kimkoha  chia bikbo bikboha.
A•ni jim•jem sokangjok chini preman naangjok,
Am•pok Ja•groba sokoa wanchi tokatpajokna.

A•sintakba naangoa pura salmrakatjokna,
Am•pok Ja•gro jadade digae wangkigrekari,
Amai amjae sokbajok ka•sinsinha nabajok,
A•sakona sokoba peka namchipja•ongjok.

Bangsi sikpipibajok A•dil duripokbajok,
Bawil mitdil darangan kusi ong∙batokengjok.
Basakoba nikpae basakoba nipae,
Bika rim•roktokaijok ku•chi minoktokaijok.

Chubitchiko man•kuja mibitean dongkuja,
Chirimitko chukanjok a•gitchakko mi du•jok.
Chianingo Wangalo a•aningo duruo,
Chrana wak dokkuja adana mi song•kuja.

Drongmani ge•eto Me•enpani agano,
Do•jepjepsa ga•jepe chroke mesokchengbajok.
Do•me potjok kasiko mande dakjok an•chengko,
Drumiting a•ningo Wanbolmiting chiningo.

Elbibikata gitaha a•gilsakna jangbajok,
Engrimole dokama? a∙an bikbo bikbojok.
Etchalukko chelukko chu dikchok dakbajok,
E•sal soksol gitalha jakpa riprap de•bajok.

Ha gose da•ode Wanbolako nikpajok,
Ha nanggo da•ode Wanbimana changpajok.
Hohobana changpajok jaksi sikna sappajok,
Haha ka•dinggrimbajok pante me•tra an•sengjok.

Jong•diket tiketa gita ku•rang sale nichengjok,
Jong•dompa sringa gita dama barat salbajok.
Jakpacha nateng tapoa songgipinna jangangjok,
Ja•pacha ga•sosetoa gipinrangba ja•rikjok.

Kok ole anticha na•karekna re•angjok,
Kotip gital ra•pana Wano ganna sandijok.
Ka•kam donna rikgitok sisa nabal sandijok,
Kni gisi galtokjok ja•anchinek nattokjok.

Lau chiringga gita me•chik desa rongchingjok,
Laugokni karima Chalang gro jebajok.
Mangguakba wakwakjok mibol misi nambajok,
Misiolba Olwengba mia-misi dingdingjok.

Narang chambil cha•naba antisahan nanggnok,
Na•tik-na•bat cha•naba bang•e sengna nangjajok.
Nagatikko takako senge dongtokarongjok,
Nagra nang•ni ku•rangna nachil songtokarongjok.

Oktongsisi dakoba bi•sa amagrioba,
Okkae cha•na man•jaoba bikma kolgapjaoba.
Okkajaoba ku•sasru dongjaoba beksasru,
Okgilo jangrakjaoba gisik-o tang•pajaoba.

Pattigipa Saljongko da•a gual Misiko,
Pagitchaman agana ma•gitchaman skia.
Pattipil•kan ambino ra•ronpil•kan ja•mano,
Pako gita okamjok ma•na gita simbrajok.

Rama bakjok chi•rongrong jajong namjok Jarambong,
Rugalgnok knapo gogatgnok sotneo.
Re•babone sarisong sokbabone chamesong,
Robabone adasong jokbabone mamasong.

Saljongbatraoniba Rong•dogacholoniba,
Salaramni mandeba Mikgitchakni panteba.
Saliramni nomilba nokkisangni chameba,
Salgipengni ripengba salgrooni bajuba.

Toktak pura su•bajok minil bitchi similjok,
Tatarana rugaljok Rabugana mitinjok.
Tokchengtok inbajok Kram Natik takbajok,
Tokmrakbajok purako knae Kram ku•rangko.

U•igrika ripengko ma•sigrika bajuko,
Umang da•ode grongjok nike kusi ong•tokjok.
Ua somoi sokosa ua kari naosa,
Umang jakgitelpajok kusi ong•na man•pajok.

Wangalani chubitchi nomil jako ra•bitjok,
Wanggrangate okkisa pante dama dokangjok.
Walo jajong namode Nokma alnamja injok,
Wal•mitiko wanoha Nokma alnama injok.

COMMENTS

Wordpress (0)
Disqus (0 )
error: Content is Copywrite!