fbpx
garo wangala dancegaro wangala danceWanna folk Dance

Mitde Aro Mande

Mitde Aro Mande

Bluwin Sangma

Nikna man•gipa Mandeni ma•kring,
Nikna man•gija Mitdeni ma•kring.
Mitdeba dingtang eribajok,
Mandeba dingtang aktongbajok.

Mitde jetogijaa, katchi ra•ringgijaa,
A•rakao songdonga, a•songdamo nokchonga.
Chiring dare rong•rimo,
Rong•ma Dareng ka•sinao.

Mitde naganderara Katchi ganagrirara,
Mitde ka•gittingrara, katchi ronggittingrara.
A•ba cha•na kenmana buring napna an•jrima,
Gele re•naba nikja kate chaknaba man∙ja.

Mitde ka•onangjoko mandeko be•en saata,
Katchini bika sojoko mandeko janggi bon•ata.
Mandeni ma•kringna bate, mitdean pakmabatama?
Jeo chagrongramramsa doke siataiama?

Chasong dingtangrorojok bilsin salrang re•angjok,
Pi∙sa-angde nikroro, mande jelbra jelsujok.
A•rakako pe∙aijok, a•songdamo songdongjok,
Abetpao sing•jajok, Ranggupana kenjajok.

Mitdena erigipako katchina aktonggipako,
Matchana ra•rongipako mongmana tingchanggipako.
Bolko den•ruruaijok wa•ko den•prakprakaijok,
Mitde nokchonggipakon Katchini noktugipakon.

Wa•al so•prakataijok agal kamprakataijok,
Mitdeni do•o jilaba katchini waka kaaba,
Gimaa ma•bontokaijok janggi jama dongjaengjok,
Gukchit jong•chit dongjajok gara benchindik grijok.

Mitdeni a•kanggipakon, katchini samsepgipakon,
Mongmani chiga ringakon matchani al•ang chanakon,
Noroha a•kangtokongjok mandeha ra•sektokongjok,
Mikbokaan dandojok matdiaan mikdokjok.

Katchiba bachi katkuna, mitdeba bano dongkuna
Mitderara chanchijok, dal•batgipa ge•etjok
Biap man•teljaode, a•dam dongteljaode,
Mandeni ka•tongo napojok, nape dongbebetokjok.

Mitde bitip ra∙esa katchi a∙kol bitesa,
Mande ka∙gitchakbajok, bika galdaltokaijok.
Mande mandeskana da∙o kenna nangongjok,
Jeko man•a so∙otjok, jako nika, dokakjok.

Share This
error: Content is Copywrite!