Achik Kurang

H. Denison Momin

Miko, Dokua, Achikni Kurang!

Inchakpachong abri akong

Mesok’ Doraja, Achikni Bimang!

Nitoatna mikchapachong.

Achikni Bimang, Achikni Rasong.

Darang doan kutangkosan

Knatonikbata ina:

Bolgrim, Ronggrim, dongjinma grim.

Dorajaming adingpaa:

Dokoreni wakwakana

Dare chiring rongkuchaka.

Kuchakboda, pante metra,

Inchroboda Achik Songna!

Dokru nosan’ maringanan

‘Bri gittim kaa moa:

Salgra waal natbaana

Doregipu gisiksoa,

Kuonboda metra pante!

Ringpaboda- kugrimade?

Daken beben’ tengsuana-

Miko, Dokua, Achikni Kurang!

Inchakpachong abri akong.

Mesok’ Doraja Achikni Bimang,

Nitoana mikchapachong!

Ringbo Dokua, Achikni Kurang,

Achikni Bimang, Achikni Rasong!

Dobakrangsa nichakmanja.

Walni joong mepilipan

Chakkiona bilpinapa

Walo aski sotokode-

Hajal hajal, ringrang ringran-

Salgi asak maatgija,

‘Sakni Matma Jakol toe

Sengwat waal soritinga.

Chakat, Achik mea mechik!

Sengaona ongkatboha;

Sko dedoe, mik’ songdoe

Kenmangija nichaoboha.

Bidani bilchamko nate

Sorikrikna, metra pante;

Duramani japaoni

Memang Mesal Charamona.

Kangkare kae, natatna hae

Jajong Kadoramonaba,

Susimeni mikkang minge

Jatengana matuchina:

Salgirani tenga ine

Metongbolo nichelchina-

Abong Rajan’ adamoba

Mikbrape mikgaochina,

Snilchimda, pante metra!

Walgrigipa jarebae

Wa-lbimao sobakchina:

Goeran’  Milam ilap ilap,

Mikka simo riprapriprap

Aski chacha chanmangija-

Nokrek salgi totaoni

Simsang chigrik pakramona-

Mikandala Achik Songna

Bidan’ waal chingchipchina!

Chipat, Achik mea mechik

Bidan’ gunko gingsikchina;

Rajasimla noksikoni

Dobakkol kolkumangona!

Spoat, bidan’ kubibako

Balsiri Balpakramona!

Memang songni chigaoba

Smildingding ringsochina.

Watat, bidan’ kubibako,

Muni nange tusigipa

Balgirani balprongako

Rangsitmane mikselchina!

Mongnal ganda nitoriri-

Nikatmana mikjumangchi-

Mite-Sagre watmatgija

Achik Asong balgaochina!

Source: Chimonggimin Achik Kurang, 1971